(រដ្ឋបាលខេត្តកំពង់ធំ)៖ នាព្រឹកថ្ងៃទី៣ ខែធ្នូ ឆ្នាំ២០២១ លោកជំទាវ ហួន ច័ន្ទបូរ៉ា នាយិកា នាយកដ្ឋានទំនាក់ទំនង កាកបាទក្រហមកម្ពុជា និង ឯកឧត្តម ងួន រតនៈ អភិបាលខេត្តកំពង់ធំ និងជាប្រធានគណៈកម្មាធិការសាខាកាកបាទក្រហមកម្ពុជាខេត្ត អញ្ជើញចូលរួមចែកអំណោយមនុស្សធម៌ជាសម្ភារៈ និងគ្រឿងឧបភោគបរិភោគ របស់កាកបាទក្រហមកម្ពុជា ជូនដល់ប្រជាពលរដ្ឋដែលមានជីវភាពខ្វះខាតចំនួន ៧៧៧គ្រួសារ ស្ថិតនៅក្នុងឃុំពាមបាង ស្រុកស្ទោង ខេត្តកំពង់ធំ។
ជាមួយគ្នានោះដែរលោកជំទាវ ហួន ច័ន្ទបូរ៉ា បានពាំនាំនូវសេចក្តីនឹករឭក និងការផ្តាំផ្ញើសាកសួរសុខទុក្ខពីសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ជូនចំពោះពុកម៉ែបងប្អូនប្រជាពលរដ្ឋទាំងអស់ ព្រមទាំងបានចាត់តាំងក្រុមការងារកាកបាទក្រហមថ្នាក់កណ្ដាល រួមជាមួយនឹងឯកឧត្តមអភិបាលខេត្តកំពង់ធំ នាំយកអំណោយចែកជូនពុកម៉ែបងប្អូនដែលកំពុងតែជួបការលំបាកនៅពេលនេះ។
ឆ្លៀតក្នុងឱកាសនោះដែរ ឯកឧត្តម ងួន រតនៈ មានប្រសាសន៍លើកឡើងថា អំណោយទាំងនេះគឺបានមកពីតាមរយៈភ្នាក់ងារស្ម័គ្រចិត្តកាកបាទក្រហម លោកមេភូមិ លោកមេឃុំ ចុះស្រាវជ្រាវតាមផ្ទះអំពីបញ្ហាជីវភាពប្រជាពលរដ្ឋ បានរាយការណ៍មកសាខាកាកបាទក្រហមខេត្ត រហូតដល់កាកបាទក្រហមថ្នាក់កណ្ដាល អំពីការលំបាករបស់បងប្អូនប្រជាពលរដ្ឋ ទើបសម្ដេចគតិព្រឹទ្ធបណ្ឌិត បានសម្រេចចាត់តាំងក្រុមការងារ និងនាំយកអំណោយទាំងនេះ មកចែកជូនបងប្អូនប្រជាពលរដ្ឋដែលកំពុងជួបការលំបាកឲ្យបានទាន់ពេលវេលា។
លើសពីនេះទៀតឯកឧត្តម ងួន រតនៈ បានអំពាវនាវដល់បងប្អូនប្រជាពលរដ្ឋទាំងអស់ដែលរស់នៅលើផ្ទៃបឹងទន្លេសាប សូមចូលរួមថែរក្សាតំបន់អភិរក្ស ដើម្បីការពារធនធានធម្មជាតិឱ្យមានការសម្បូរឡើងវិញ ហើយមាននិរន្តរភាពតកូនតចៅទៅមុខទៀត៕
ប្រភព៖ រដ្ឋបាលខេត្តកំពង់ធំ