កម្មករខ្មែរ ដែលមានជីវភាពខ្វះខាត ចំនួន៥៤គ្រួរសារ ដែលកំពុងឋិតនៅក្នុងតំបន់បិទខ្ទប់ក្នុងភូមិសាស្ត្រផ្សាររោងក្លឿ ប្រទេសថៃទទួលបានអំណោយពីក្រុមអាជីវករ តាមរយះ លោក ហ៊ឹម សុវណ្ណ
ខេត្តបន្ទាយមានជ័យ៖កម្មករខ្មែរដែលស៊ីឈ្នួលបោកនិងដេស្បែកជើង ដេរកាបូប ដេរខោអាវ និងដេមួក ដែលកំពុងស្នាក់នៅបន្ទប់ជួល២០០បន្ទប់ ឋិតនៅក្នុងតំបន់បិទខ្ទប់ ក្នុងភូមិសាស្ត្រផ្សាររោងក្លឿ ស្រុកអារញ្ញ ខេត្តស្រះកែវ ប្រទេសថៃចំនួន៥៤គ្រួសារ ដែលមានជីវភាពខ្វះខាត ទទួលបានអំណោយពីសប្បុរសជន ដែលជាក្រុមអាជីវករលក់ដូរក្នុងផ្សាររោងក្លឿទាំងអស់ ផ្ដល់ជូនតាមរយៈលោក ហ៊ឹម សុវណ្ណ ដែលជាអាជីវករដូចគ្នា នឹងតំណាងឲ្យអាជីវករក្នុងផ្សារទាំងអស់ នៅចំណុចផ្សារដំបូលខៀវជាប់ព្រំដែនកម្ពុជា។
លោក ហ៊ឹម សុវណ្ណ បានឲ្យដឹងថា ការចុះចែកអំណោយជូនដល់កម្មករខ្មែរនៅថ្ងៃទី១៣ ខែកញ្ញា ឆ្នាំ២០២១នេះ ដោយមានការអញ្ជើញចូលរួមពីអ្នកគ្រប់គ្រងផ្សារ ទាហានឈុតខ្មៅ និងអាជ្ញាធរមូលដ្ឋាននៃប្រទេសថៃផងដែរ។
លោកបញ្ជាក់ថា អំណោយដែលយកមកចែកជូនដល់កម្មករខ្មែរដែលមានជីវភាពខ្វះខាត កំពុងស្នាក់នៅចំណុចខាងលើនោះ បានមកពីសប្បុរសជន ដែលជាអាជីវករខ្មែរនៅក្នុងផ្សាររោងក្លឿទាំងអស់ដើរប្រមូលលុយគ្នា ដើម្បីយកមកប្រគល់ជូនលោកទិញជាសម្ភារះនិងគ្រឿងឧបភោគបរិភោគ យកមកចែកជូនដល់ពួកគាត់ ដើម្បីជាការកាត់បន្ថយការខ្វះខាតមួយគ្រាផងដែរ។
អំណោយដែលត្រូវចេះជូនដល់កម្មរខ្មែរទាំង៥៤គ្រួសារ ក្នុងគ្រួសារទទួលបាន៖ អង្ករ, មី ,ត្រីខ ,ប្រេងឆា ,ទឹកត្រី ,ទឹកស៊ីអីវ ,ស្កសរ ,ប៊ីចេង ,អំបិល ,ទឹកបរិសុទ្ធ ,សាប៊ូបោកខោអាវ ,និងពងមាន់ចំនួន ១បន្ទះ ស្មើនឹង ៣០គ្រាប់ផងដែរ។ដោយឡែកសម្រាប់ថ្ងៃទី១៤ ខែកញ្ញា លោក ហ៊ឹម សុវណ្ណ នឹងបន្តនាំយកអំណោយដែលទទួលបានពីក្រុមអាជីវករ ផ្តល់ជូនកម្មករខ្មែរដែលមានជីវភាពខ្វះខាតខ្លាំងជាងគេនៅក្រៅតំបន់បិតខ្ទប់ ក្នុងភូមិសាស្ត្រខាងលើចំនួន១០គ្រួរសារក្នុងមួយគ្រួសារទទួលបាន អង្ករ, មី ,ត្រីខ ,ប្រេងឆា ,ទឹកត្រី ,ទឹកស៊ីអីវ ,ស្កសរ ,ប៊ីចេង ,អំបិល ,ទឹកបរិសុទ្ធ ,សាប៊ូបោកខោអាវ ,ភួយ ,មុង , កន្តេល និងពងមាន់ចំនួន ១បន្ទះ ស្មើនឹង ៣០គ្រាប់។
ជាមួយគ្នានោះដែរលោកក៏បានថ្លែងអគុណ ចំពោះសប្បុរសជនទាំងអស់ដែលបានជួយគ្នាក្នុងគ្រាលំបាក ក្នុងអំឡុងដែលប្រទេសក៏ដូចជាលើពិភពលោក កំពុងជួបវិបត្តិនូវជំងឺកូវីដ១៩ដ៏សាហាវនេះ។
សូមបញ្ជាក់ផងដែរថា ថ្មីនេះប្រព័ន្ធផ្សព្វផ្សាយក្នុងស្រុកថៃ បានធ្វើការផ្សព្វផ្សាយពាក់ព័ន្ធទៅនឹងអាជ្ញាធរនៃប្រទេសថៃ យល់ព្រមឲ្យអាជ្ញាធរកម្ពុជា ចាក់វ៉ាក់សាំងបង្ការជំងឺកូវីដ១៩ ជូនអាជីវករ កម្មករខ្មែរ ដែលកំពុងស្នាក់នៅ នឹងលក់ដូរនៅក្នុងភូមិសាស្ត្រផ្សាររោងក្លឿ ប្រទេសទថៃ តាមការស្នើសុំរបស់រដ្ឋបាលខេត្តបន្ទាយមានជ័យ តែមិនទាន់កំណត់ថ្ងៃច្បាស់លាស់នៅឡើយទេ។
គួររម្លឹកផងដែរថា នៅក្នុងភូមិសាស្ត្រផ្សាររោងក្លឿ ប្រទេសថៃទាំងមូល ត្រូវបានអាជ្ញាធរថៃធ្វើការបិតខ្ទប់ផ្សារមិនអនុញ្ញាតឲ្យមានការចេញចូលឡើយ ពោលគឺជាតំបន់ក្រហមចាប់តាំងពីថ្ងៃទី០៥ ខែសីហា ឆ្នាំ២០២១ រហូតមកដល់ពេលនេះ បន្ទាប់ពីផ្ទុះនូវជំងឺកូវីដ១៩៕